هتعمل ايه بعد كده ؟؟

من اربع سنين والواحد داخل الكليه بصراحه مكنتش اتوقع ان الاربع سنين يعدوا كده بجد فاتوا زى ما يكونوا ثوانى ويمكن اقل بجد المهم بعد ما خلصوا الاربع سنين واحنا دلوقتى مستنيين النتيجه ان شاء الله ربنا يعديها على خير

بس السؤال المهم بقى يا جماعه هنعمل ايه ده موضوع للنقاش يعنى لما بسأل اصحابى هتعملوا ايه لقيت تقريبا خمسه واربعين فى الميه منهم خلاص كفايه كده تعليم وهيبدأوا بقى يدوروا على شغل طيب يا جماعه هتشتغلوا ايه بالشهاده بس كده من غير اى اضافات ليها اللى يقول بقى هنشتغل ميديكال ريب واللى يقول هيشتغل فى معمل تحاليل واللى يقول هيقف فى صيدليه وده للاسف لان كليتنا مش واخده حقها بره فى المجتمع وده بسببنا برضو المهم يعنى لقيت خمسه واربعين فى الميه التانيين ناويين ياخدوا دبلومه التحاليل ويكملوا فى المعامل مع انهم مبيقدروش يفتحوا معمل بيبقى معاهم بس تصريح انه يشتغل فى معمل لكن مش يفتح معمل وده للاسف لاننا خريجين كليه علوم طنطا اللى مبتكتبلكش انك واخد شهاده كيميا وبتديلك شهاده منفصله انك دارس كيميا مع اننا بيطلع عنينا فى الكيميا دى المهم كده وصلنا تسعين فى الميه تقريبا من الناس

كمان فى مجالات كويسه اوى للكليه زى الطاقه الذريه بقى ومجال البترول والحاجات الجامده دى بس عاوزه وسايط بقى وحاجات كده وطبعا الناس اللى بيشتغلوا فى الحاجات دى بيبقوا اقل من واحد فى الميه

العشره فى الميه الباقيين بقى ويمكن اقل بيفكروا انهم يحضروا ماجستير ويكملوا وكده وانا بصراحه من العشره فى الميه دول لان رأيى ان مادام الكليه مش واخده حقها فى المجتمع مش معقول لو اخدنا ماجستير وكملنا دراسه وكده برضو مش هناخد حقنا يبقى حرام حتى لو مخدناش حقنا هنا هيتفتح فرص كويسه للسفر بره والناس بره تبدأ تقدر اللى معاه ماجستير او كده ولا انتوا ايه رأيكوا ؟؟

المهم انا عاوز اعرف الناس شايفين الموضوع ازاى او هيعملوا ايه بعد التخرج او كده واسف للاطاله يا جماعه

موضوع جميل ياساد بس مش كنت تستنى لما النتيجه تظهر عشان نتكلم بثقه اكتر
المهم انا اعتقد انى اضم ل 45% الا هيعملو دبلوبه تحاليل دا لو ف تصيب وربنا اراد
وان شاء الله خير

فعلا الاربع سنين عدوا كانهم ثوانى
وربنا يسترفى النتيجه ويعديها ع خير ان شاء الله ويوفقنا كلنا ياااااااا رب
انا برضه اعتقد انى من ال 45% اللى هيعملوا دبلومه التحاليل واللى ربنا عايزه هيكون ان شاء الله

موضوع فعلا جميل انك تطرحة يا ساد

بس بصراحة لسة مش قررت احتمال اكون من 45%اللى هيعملوا الدبلومة واحتمال احب اشتغل بس بردو مش قررت اشتغل اية وكلة معتمد على النتيجة وان شاء الله ربنا ييسر ويستر على النتيجة

والله ياساد ربنا يستر فى النتيجه اولا علشان سامع انها هتبقى فى الكنترول يوم الثلاثاء اللى جاى
ربنا يوفق الجميع
ثانيا لازم الواحد مننا يخطط هيعمل ايه من دلوقتى عن نفسى انا عاوز اكمل واعمل تمهيدى وماجستير ودكتوراه
وانا معاك فى الراى خريج علوم لازم يكمل درسات عليا علشان يحقق ذاته ويتوج مجهود الاربع سنين وهى دى وجهه نظرى واسف على الاطاله

كويس انك طرحت موضوع زى ده يا ساد لانه مهم فعلا
وانا شايفه انها هتكون حاجه كويسه لو طالب العلوم كمل بعد الكليه لانى شايفه الاربع سنين اللى احنا درسناهم دول يعتبرو قاعده او اساس نكمل عليه بعد كده ان شاء الله . واعتقد لو كل طالب عنده المقدره انه يكمل
دراسه وكمل فعلا, اعتقد اننا بكده ممكن نثبت نفسنا وبمجهودنا نلفت نظر المجتمع اللى مش بيقدرنا , واسفه انى طولت بس فعلا الموضوع حيوى .
بالنسبه لانى هعمل ايه فان شاء الله ناويه اعمل الدبلومه بس ربنا يسترها فى النتيجه وتعدى على خير ان شاء الله وبالتوفيق للجميع.

هجوز وقعد في البيت وانسي اني خدت شهادة بعد اما دورت كتير وطلع عيني وحضرت تمهيدي ومش عارفة هنجح ولا هعمل اية اسفة مش تشاؤم ولا احباط بس انا كملت عشان اثنت نفسي لان مرة معيد قالي انتي نسيتي نفسك انا دكتور وانت طالبة يعني مكنش طالب

هو انا لسة مدخلتش كلية بس عارفة ازمة الشغل والكلام ده بس انا لو كنت خلصت كلية علوم انا كنت هعمل مجستير ودكتوراه كمان مش عشان الشغل بس عشان انا عايزة اطلع بره مصر

هناك بيهتموا بالناس اللى زى كده وبيقدروهم
انا هكون من العشرة فى الميه

أنا عن نفسى هتجوز وأقعد فى البيت
هههههههههههههههه
بهزر طبعا أنا ناوية بإذن الله أكمل دبلومة وماجستير كمان مع انى مش ناوية أشتغل بس انا بتعلم العلم للعلم مش للشغل ولو حتى احتاجت للشغل يكون معايا شهادة كويسة أشتغل بيها

» تخيل لو دى جدتك هتعمل ايه ؟؟؟؟؟؟؟؟؟؟؟؟؟؟
» لوكنت مشرف في المنتدي كنت هتعمل اية ؟؟؟؟؟